يوم فى حياة هارون

نظرة ياحى المطار

نظرة بس يالامتداد

نظرة للابسين سواد

نظرة للحداين حداد

نظرة للطول عمرهم نادمين وسافين الرماد

نظرة للفى اليوم بيسألوا انفسهم مليون سؤال

جابونا ليه؟؟؟؟؟؟؟؟؟

ولدونا ليه؟؟؟؟؟؟؟؟؟

افكار فى راس الود هارون

هارون ادم

افكار بدور زى الطاحونة الدايرة عشان العمدة وبس

العمدة الخامى هوا الدنيا وهارون آدم مالاقى نفس

هارون آدم لسة صغير

لسع مافات سن العشرين

لكنه ملان ألام وهموم

لكنه ملان أهات وانين

من مافتح عرف انه طريقه طويل وحزين

من هو صغير عرف الدنيا وعرف انه عليه يكوس العيش

ولو شفتوا مرارة أكل العيش

لى شافع ماتم العشرين

ويكون مسئول عن اسرة كمان؟!

مسكين هارون

خلاه ابوه فى بطن امه

اتوكل ومات

ولدوه يتيم

لقى قدامه اخوه الفاضل

واختو حليمة الماتت بالسل

واصبح بس ياهو الفاضل

هارون اتذكر كل الكان

اتذكر اخوه الجا الخرتوم

وقبل يتوظف مات مصدوم

واتذكر صمة امه امس

برصنهى تموت فى صدمة كمان؟!

معقول ياناس
؟

معقول بس؟

قال هارون بى صرخة كون

ماحيكون.............

هارون صمم.............

لازم يلقى دوا لامه

قال الدكتور داير (دوا نيل)

حافظو كويس

وقرا فى الورقة كمان اسم امه

هارون فرحان

بعرف يقرا

اصله زمان من جا الخرتوم

خش فى مدرسة قرا بالليل

هارون فرحان

هارون ادم حس بانه

قرا بس شان يقرا اسم امه

وعشان يعرف يحفظ ( دوانيل)

مسكين هارون

هارون ادوم ماعارف شئ

فاكر الدوانيل شان الصدمة........

وماعارف امه ملانه مرض

ضغط وحمى وسكرى فى الدم

صدمة امس صدمة بسيطة

لكن الصدمة الجابها الهم

والمرض الفى عضامها مردوم

ضغط وحمى وسكرى فى الدم

مسكين هارون.....

هارون آدم فى جيبه تلاتة جنيه وتلاتين قرش

مشى للاجزخنجى شان(الدوانيل)

ولقى الدوانيل

لكنه بمية وتلاتين قرش

هارون اتبلم بالهجمة

وعيونو بقن قدر الهجمة

واتحنط زى الغدرو عرش

اتذكر اخوه الجا الخرتوم

وقبل يتوظف مات مصدوم

واخته حليمة الماتت بالسل

واتذكر كيف الحالة شلش

ومرق الشارع كله هموم

فى قلبه المغسة

وفى بطنو

وفى عيونه الشايلة اسى الخرتوم

هارون صمم...........

لازم يلقى دوا لامه

ولازم يشفى عشان تسلم

ولازم يستحمل ويستحمل

مش قبل كدا كتير استحمل

؟؟؟؟؟؟؟؟؟؟؟؟؟؟؟

هارون صمم

هارون ادم بيبيع اكياس

ولو شفته وشايله ايدينه الكيس

تحلف على انه الكيس اتقل

هارونة ادوم جزمة قديمة وعراقى ملان زيت ومهلهل

وعضام مرصوصة بدون لحمة ويمكن لو قام هوا اتنصل

هارون ادم لفى الشارع

ماتعود يوم يشحد لقمة

بقى شيالى

باع الموية

ولملم حق الدوا فى ليلة

كان لازم يقوى يشد حيله

فعلا لملم

لكنه عشان مكتوبله فقر

ولانه نقر

فات للاجزخنجى شان الدوانيل

لقى الدوانيل شالوه قبيل

قال ليه الاجزخنجى مافى بديل.........

هارون كضم

مانضم

ماهرش

والزيه يقدر للهرش

؟؟؟؟؟؟

والزيه مالو على الهرش؟؟!!

يايابا لا ضهرا حمش

لابدله لاوش لا كرش

وديل جواز سفر المسافر على قبور اهلى الغبش

لا لاهارون ماهرش

هارون كضم

مانضم

ماسال عن الفتيل......

ماسال قال شاله مين؟

لانو عارف شالو مين؟

شالوه اب جيبا تقيل

المابفتشو للقرش

المشيهم كلو مال

هارون مرق

دقش الظلط

ولما جات فى عيونه اضواء النيون

كانت هناك امه بتودع فى العيون

هارون مرق لليل وحيد

بى وش حزين وعيونو تقال

مليانه نوم واسى وهموم

واحزان كتيرة تهد جبال

هارون مرق

لف الشوارع فى اسى وفى ضلوعه صوت مليون سؤال

وفى دموعه صوت مليون سؤال

جابوه ليه؟

ولدوه ليه؟
لعز الدين هلالهى

ولكى عاطر تحياتى منى ومن جيلى

فكونى حاضرة ياسيدتى

ومتعك الله بالصحة والعافية